Mýrdælingurinn Kristín Ólafsdóttir er dúx Fjölbrautaskóla Suðurlands á vorönn 2021. Í gær brautskráðist 101 nemandi frá skólanum í óhefðbundinni brautskráningu.
Vegna samkomutakmarkana var brottfarendum skipt niður í tvo hópa og tvær athafnir fóru fram kl. 11 og kl. 13:30. Báðum athöfnum var streymt á netinu.
Kristín Ólafsdóttir, Lýdía Líf Aronsdóttir og Guðný Von Jóhannesdóttir hlutu viðurkenningu frá Hollvarðasamtökum FSu. Kristín hlaut að auki viðurkenningar fyrir framúrskarandi árangur í stærðfræði og dönsku. Lýdía Líf hlaut að auki viðurkenningar fyrir afbragðs árangur í félagsgreinum, ensku, íslensku og stærðfræði og Guðný Von hlaut að auki viðurkenningar fyrir góðan árangur í erlendum tungumálum, íslensku og sögu.
Gígja Marín Þorsteinsdóttir hlaut Menntaverðlaun Háskóla Íslands fyrir frábæra frammistöðu á stúdentsprófi. Gígja hlaut einnig viðurkenningu fyrir vel unnin störf í þágu félagslífs skólans.
Margir fleiri nemendur hlutu viðurkenningar. Sveinn Bergsson hlaut viðurkenningu fyrir metnað og frábæran árangur í vélvirkjagreinum og Brynjar Gísli Stefánsson hlaut viðurkenningu fyrir frábæran námsárangur í húsasmíði. Kristófer Agnarsson hlaut viðurkenningu fyrir framúrskarandi áhuga og dugnað í hönnun, textíl og trésmíði og Kristrún Júlía Halldórsdóttir hlaut viðurkenningu fyrir framúrskarandi árangur í hönnun og textíl.
Jón Ingi Guðfinnsson hlaut viðurkenningu fyrir framúrskarandi árangur í íþróttum, Arney Ólöf Arnardóttir hlaut viðurkenningu fyrir góðan árangur á hestalínu og Elísabet Erla Birgisdóttir hlaut viðurkenningu fyrir framúrskarandi árangur í matreiðslu. Sigurbjörg Steinarsdóttir hlaut viðurkenningu fyrir framúrskarandi árangur í stærðfræði og Oliver Gabriel Figlarski hlaut viðurkenningar fyrir frábæran árangur í náttúrufræðigreinum og stærðfræði.