Krapastífla í Skógá – Skógafoss vatnslítill

Myndin er tekin í morgun en vatnsrennslið hefur eitthvað aukist síðan þá. Ljósmynd/Lögreglan á Suðurlandi

Mjög lítið rennsli er nú í Skógá og þar með Skógafossi. Í tilkynningu frá lögreglunni á Suðurlandi segir að kunnugir hafi bent á að það geti stafað af krapastíflu í ánni sem síðan ryðji sig og við þær aðstæður geti komið flóð fram ána.

Ekki hafa fundist heimildir um mögulega stærð slíks flóðs og að líkindum skiptir þar miklu máli hvar stíflan er staðsett.

Til öryggis hefur ferðamönnum verið vísað fjær fossinum og eru lögreglumenn og björgunarsveitarmenn nú þar á svæðinu við þá vinnu.

Vatnamælingasviði Veðurstofunnar hefur verið gert viðvart um málið en veðurfarslegar aðstæður eru þannig að ekki er unnt að skoða ofar í ána að sinni en það verður gert um leið og viðrar til þess.