Krakkaborg lokað vegna myglusvepps

Leikskólanum Krakkaborg á Þingborg í Flóahreppi hefur verið lokað vegna myglusvepps sem greinst hefur í húsnæðinu.

Húsnæði leikskólans hefur verið í athugun undanfarið vegna raka og hugsanlegrar myglu. Í gær bárust niðurstöður frá Náttúrufræðistofnun Íslands þess efnis að myglusvepp sé að finna í húsnæði leikskólans.

Leikskólastjórnendur, formaður fræðslunefndar, sveitarstjóri og oddviti hafa fundað um málið og tekin hefur verið ákvörðun um að loka leikskólanum um óákveðinn tíma og sérfróðir aðilar fengnir til ráðgjafar varðandi framhaldið. Leikskólanum verður fundið bráðabirgðahúsnæði eins fljótt og unnt er og stefnt er að því að starfsmenn leikskólans geti tekið verði á móti börnunum hið allra fyrsta.

Kapp verður lagt á að vinna hratt að framvindu máls og hefur foreldraráð, foreldrar, starfsmenn leikskólans, fræðsluyfirvöld og sveitarstjórn verið upplýst um stöðu mála.