Stóri plokkdagurinn var haldinn síðastliðinn sunnudag um allt land. Á Hellu mættu 25 manns til leiks í blíðskaparveðri, dreifðu sér um þorpið og tíndu rusl af krafti.
Rótarýklúbbur Rangæinga var plokkurunum til fulltingis. Fulltrúar klúbbsins afhentu poka og hanska og sáu um veitingarnar að plokki loknu; grillaðar pylsur og drykki sem runnu ljúflega niður eftir átökin. Það voru heiðurshjónin Grétar Hrafn Harðarson og Sigurlína Magnúsdóttir sem stóðu vaktina fyrir hönd rótarýklúbbsins.
Rangárþing ytra vill hvetja íbúa og ekki síst fyrirtæki til að huga að sorpmálum. Upplagt er að taka með sér ruslapoka í alla göngutúra og tína upp það sem á vegi manns verður. Eins er mikilvægt að fyrirtæki hugi vel að lausamunum sem vilja fjúka frá vinnusvæðum.
