Konan fór út með soginu

Konan sem lést við Dyrhólaey í gær hafði farið ásamt eiginmanni sínum, syni á þrítugs aldri og 14 ára dóttur niður í Kirkjufjöru austast á Dyrhólaey þegar stór alda kemur og fellir soninn og tekur hann með sér út.

Móðirin lenti einnig í briminu og fór út með soginu. Sonurinn komst af sjálfsdáðum í land og ásamt föður sínum og systur í öruggt skjól. Öll fjölskyldan mun með einum eða öðrum hætti hafa lent í briminu en mis mikið þó.

Rannsókn á tildrögum slyssins stendur enn yfir. Fyrir liggur að mikið brim og sog var við ströndina í gær og aldan breytileg þannig að á stundum náði hún tiltölulega skammt upp í fjöruna en síðan komu stærri fyllur sem lömdu á klettum eyjarinnar.
Um klukkustund eftir að tilkynning um slysið barst sást hvar konuna rak á land í fjöruna skammt austan við Dyrhólaós. Áhöfn þyrlu Landhelgisgæslunnar flutti hana á sjúkrahús í Reykjavík en þá höfðu lífgunartilraunir áhafnar þyrlunnar ekki borið árangur og var hún úrskurðuð látin fljótlega eftir komu á slysadeild.

Eiginmaður konunnar og börn voru flutt með sjúkrabifreið á slysadeild í Reykjavík en voru útskrifuð í gærkvöldi og aðstoðaði lögregla þau við að komast í náttstað. Þau njóta aðstoðar sendirðáðs síns.

Í tilkynningu frá lögreglunni segir að við Dyrhólaey séu skilti á þremur tungumálum auk íslensku sem vara m.a. við hættu af sjógangi. Göngustígar eru víðast afmarkaðir með keðjum. Áfram er unnið að rannsókn málsins.