Reiðhjólaverkstæðið Keðjan opnaði nýlega á Selfossi og hefur fengið frábærar viðtökur.
„Ég sá svo mikið af fyrirspurnum inni á Íbúar á Selfossi á Facebook að auljóst var að það vantaði svona þjónustu hérna. Mér datt í hug að bjóða upp á þetta en ég hef verið að gera við hjól frá því að ég var smástrákur,“ segir Guðmundur Örn Sverrisson, eigandi Keðjunnar í samtali við sunnlenska.is.
Augljóslega mikil vöntun
Guðmundur starfar einnig sem fjallaleiðsögumaður en hann rekur fyrirtækið Fjallafjör við góðan orðstír.
„Ég býð upp á hjólaferðir og er vanur að gera við hjól. Ég sá líka tækifæri að gera þetta á heiðarlegan hátt. Ég er ekki hlynntur þessu svarta hagkerfi,“ segir Guðmundur og bætir við að fólk sé stundum hissa þegar hann vill helst ekki reiðufé og réttir fram posann. Enn sem komið er er fyrirtækið staðsett í bílskúrnum hans að Laxabakka 9 á Selfossi.
Þó að það séu ekki nema sex vikur síðan Keðjan hóf starfsemi sína þá hefur fyrirtækið stimplað sig rækilega inn og annar Guðmundur varla eftirspurn.
„Viðtökurnar hafa verið mjög góðar. Ég panta yfirleitt ríflega af varahlutum og þegar þeir koma þá eru yfirleitt flestir varahlutirnir þegar farnir og hjólin bíða.“
„Ég átti ekki von á svona góðum viðtökum. Það kom líka skemmtilega á óvart hvað allir eru jákvæðir og ánægðir að hafa svona þjónustu hérna. Það var augljóslega mikil vöntun fyrir þjónustu eins og þessa hér á svæðinu.“
Dreymir um að opna reiðhjólaverslun
Guðmundur fær hjól af öllum gerðum, stærðum og ástandi til sín og enn sem komið er hefur hann náð að gera við þau öll – líka hjólin sem við fyrstu sýn litu það illa út að óvíst var hvort það væri hægt að bjarga þeim.
„Það er mjög gaman þegar maður fær hjól í hendurnar sem maður er ekki viss um hvort maður geti gert við, sérstaklega ef hjólið hefur tilfinningalegt gildi, en svo nær maður að gera það nothæft.“
„Það er líka rosalega gaman að fá hjól sem eru talsvert illa farin en að ná að laga þau, því að reiðhjól eru ekki ódýr. Sorglega hátt hlutfall reiðhjóla lifir ekki af fyrstu keðjuna. Það er að segja að fyrsta keðjan sem kemur á reiðhjólinu, hún nær ekki að slitna áður en aðrir hlutir á hjólinu eru ónýtir af ryði eða slakri meðferð.“
„Það væri gaman að opna reiðhjólaverslun og þjónusta Selfyssinga almennilega með reiðhjól í samvinnu við góða innflutningsaðila og trausta framleiðendur. Ég býð fólk velkomið og ekki hika við að hafa samband. Best er að bóka í gegnum síma eða í einkaskilaboðum. Ég hvet fólk til að versla í heimabyggð,“ segir Guðmundur að lokum.