Koddaslagur á Stokkseyri

Sjómannadagurinn verður haldinn hátíðlegur á Stokkseyri á morgun og hefst dagskráin með hátíðarguðsþjónustu í Stokkseyrarkirkju kl. 11.

Að henni lokinni verður lagður blómsveigur að minnisvarða um drukknaða sjómenn.

Kl. 13:30 hefst skemmtidagskrá á íþróttavellinum þar sem boðið verður upp á kassaklifur, stígvélaþeytu, reiptog og hjólböruratleik.

Við höfnina verður koddaslagur og skemmtisigling og er fólk hvatt til að mæta og taka þátt í koddaslagnum.

Kl. 14:30 verður síðan sjómannadagskaffi í barnaskólanum.

Það er Björgunarfélag Árborgar sem sér um hátíðarhöldin en styrktaraðilar eru Pylsuvagninn á Selfossi og Verkalýðsfélagið Báran.