Óvæntur gestur mætti á Selfossvöll í dag þegar Selfoss og ÍA leiddu saman hesta sína í 1. deild kvenna í knattspyrnu. Undir lok leiks tölti hestur inn á vallarsvæðið og rásaði beina leið inn í félagsheimilið Tíbrá.
Veitingasalan í Tíbrá er annáluð fyrir gæði og spurning hvort sá rauði hafi frétt af því. Hann fékk hins vegar ekkert fyrir sinn snúð þar og skeleggir gæslumenn handsömuðu klárinn hratt og vel og var hann fljótlega aftur kominn í réttar hendur.
