Klakastífla í Hvítá

Á suðurbakka Hvítár, norðan við Langholt í Flóahreppi. Myndin er tekin í febrúar 2018. sunnlenska.is/Helga R. Einarsdóttir

Í gærkvöldi fékk lögreglan á Suðurlandi tilkynningu um að klakastífla væri í farvegi Hvítár fram af landi Vaðness í Grímsnesi. Stíflan er sögð loka ós Höskuldslækjar og leggst vatn úr honum nú að sumarhúsabyggð á bökkum árinnar norðanmegin.

Ekki er vitað til þess að tjón hafi orðið af en samkvæmt tilkynningunni hafði tilkynnandinn fyrst orðið þessa ástands var í fyrradag og í gær hafði heldur sjatnað í árfarveginum.

Lögreglan hefur upplýst sveitarstjóra í Grímsnes- og Grafningshreppi, Flóahreppi og í Árborg um málið og verður staðan skoðuð í dag þegar bjart er orðið.

Í febrúar 2018 kom klakastífla á sama stað og flæddi þá að umræddum sumarhúsum þannig að eitthvert vatnstjón hlaust af. Sú stífla ruddi sig skömmu síðar.