Alma D. Möller hefur ráðið Selfyssinginn Kjartan Hrein Njálsson sem aðstoðarmann sinn og hefur hann störf í næstu viku.
Síðustu sjö ár hefur Kjartan Hreinn starfað hjá embætti landlæknis sem aðstoðarmaður landlæknis. Þar áður var hann annar tveggja ritstjóra Fréttablaðsins. Kjartan Hreinn er með BA-gráðu í bókmenntafræði og býr í Hafnarfirði ásamt unnustu sinni og tveimur börnum.
„Ég þekki vel til Kjartans sem starfaði náið með mér þegar ég gegndi embætti landlæknis. Í starfi sínu hjá embættinu til sjö ára hefur hann öðlast mikilvæga þekkingu á heilbrigðismálum, ekki síst gæðum og eftirliti, auk þekkingar á stjórnsýslu þessara mála. Hann verður góður liðsauki í ráðuneytinu og ég hlakka til samstarfsins við hann,“ segir Alma.
Kjartan tekur við starfi aðstoðarmanns af Jóni Magnúsi Kristjánssyni og mun starfa við hlið Guðríðar Láru Þrastardóttur sem einnig er aðstoðarmaður ráðherra.