Kirkjufjöru lokað til bráðabirgða

Umhverfisstofnun mun til bráðabirgða loka aðgengi að Kirkjufjöru og brýnir stofnunin fyrir fólki að fara alls ekki niður í fjöruna enda líkur á að meira muni hrynja úr klettum ofan Kirkjufjöru.

Sunnlenska.is greindi fyrst frá því aðfaranótt laugardags að stór skriða hefði fallið úr eynni á föstudag niður á Kirkjufjöru sem er sunnanundir Lágeynni.

Veðurstofa Íslands mun um miðja vikuna gera nákvæmari athugun á stöðugleika bjargbrúnarinnar og upplýsa í kjölfarið hvort að ástæða sé til að varast umferð um fjöruna eða bjargbrúnir Dyrhólaeyjar.

Umhverfisstofnun hefur óskað eftir fundi með Almannavarnanefnd Mýrdalshrepps og lögreglu þar sem rætt verður um viðbrögð við auknu hruni úr klettum Dyrhólaeyjar.