Laugardaginn 5. september síðastliðinn vígði Davíð Bartimej Tencer, biskups kaþólsku kirkjunnar á Íslandi, hina nýju Kirkju hins heilaga Kross á Selfossi að viðstöddu miklu fjölmenni en talið er að um 600 manns hafi verið við athöfnina.
Vígsla kirkjunnar fylgdi sérstökum helgisiðum kirkjuvígslu. Athöfnin hófst fyrir utan húsið þar sem biskup og klerkar gengu til kirkjunnar. Kirkjusmiður afhenti Davíð biskupi kirkjulykilinn og síðan klipptu biskupinn og Bragi Bjarnason, bæjarstjóri Árborgar, á borðann við innganginn. Að því loknu hófst sjálf vígsluathöfnin og hátíðarmessan.
Verkefnið naut verulegs stuðnings erlendis frá
Kirkjan stendur við Móaveg, skammt frá bökkum Ölfusár. Hönnuður kirkjunnar er Kristinn Ragnarsson, arkitekt. Húsið samanstendur byggingin af kirkjuskipi, safnaðarheimili og íbúðahluta fyrir presta og er það hannað á grundvelli algildrar hönnunar. Miðað er við að kirkjuskipið rúmi allt að 180 manns en samkomusalurinn allt að 140. Framkvæmdir voru í höndum Aðalvíkur.
Samkvæmt þýskum kirkjulegum heimildum var heildarkostnaður við framkvæmdina rúmar 560 milljónir króna en verkefnið naut verulegs stuðnings erlendis frá. Þýsku hjálparsamtökin Bonifatiuswerk og Diaspora-Kommissariat þýsku biskupanna studdu framkvæmdina með rúmlega 154 milljónum króna, sem er meira en fjórðungur byggingarkostnaðarins.
Krossinn í Kaldaðarnesi einn þekktasti helgidómur Suðurlands
Nafnið á nýju kirkjunni var ekki valið af tilviljun. Þegar hin nýja sókn var stofnuð á Krossmessu 14. september 2025 skýrði séra Denis O’Leary frá því að nafnið tengdist sögu kristni á Suðurlandi. Í Kaldaðarnesi í Sandvíkurhreppi hafði á kaþólskum tíma verið kross sem naut mikillar helgi. Pílagrímar leituðu þangað, auk heimamanna, og varð krossinn einn þekktasti helgidómur Suðurlands.
Frá þessu öllu greinir Ragnar Brynjólfsson í ítarlegri grein á kirkju.net.
