Kettirnir aftur frjálsir í Árborg

Bæjarstjórn Árborgar ætlar að fella úr gildi bann við „lausagöngu“ katta. Ákvörðunin kemur í kjölfar ályktunar Dýralæknafélags Íslands um að bannið sé óboðlegt.

Ný kattasamþykkt sveitarfélags­ins var samþykkt samhljóða í bæjar­stjórn í fyrrasumar. Sunnlenska vakti fyrst athygli á hinu óvenjulega ákvæði í vor og vakti málið umtal. Í kjölfarið hóf dýrafangari sveitar­félagsins að taka harðar á lausum köttum.

Eyþór Arnalds, formaður bæjar­ráðs, segir að nýr meirihluti hafi látið endurskoða 5. grein samþykktar­innar. Niðurstaðan hafi verið sú, að köttum væri ekki eðlislægt að vera bundnir og krafan um að þeir skuli „ekki lausir úti við í þéttbýli“ því óraunhæf. „Tilgangslausar reglur er best að afnema,“ segir Eyþór.

Er reglan frumsamin?
Regluna um að kettir skuli ekki lausir í þéttbýli er að finna í Árborg og Norðurþingi, eftir því sem Sunnlenska kemst næst við leit í Stjórnartíðindum. En hver samdi hana? „Regluna er upphaflega að finna í kattasamþykkt sveitarfélagsins frá árinu 2005,“ útskýrir Ásta Stefánsdóttir, framkvæmdastjóri Árborgar. „Þáverandi landbúnaðarnefnd ákvað reglur um hunda- og kattahald á sínum tíma. Tilefnið var ami af lausum köttum á Selfossi, skilst mér. Óljóst er hvort ákvæðið hafi verið frumsamið.“

Sjá nánar í Sunnlenska fréttablaðinu PANTA ÁSKRIFT