Fyrr í mánuðinum fengu bæði Kerlingarfjöll Highland Base og The Retreat Hotel við Bláa lónið einn Michelin lykil hvort og eru því í hópi 34 gististaða á Norðurlöndunum sem The Michelin Guide heiðrar í ár.
Þar er mælt með um 7.000 gististöðum um allan heim, sem hljóta frá einum og upp í þrjá lykla út frá mati byggðu á fimm breytum sem skipta ferðalanga máli. Michelin stjörnur hafa verið veittar veitingastöðum í yfir hundrað ár og eru þær ein eftirsóttasta viðurkenning sem veitingastöðum getur hlotnast. The Michelin Key er af sama meiði og veitir
hótelum og gististöðum sem standast strangar gæðakröfur viðurkenningar sem kallast lyklar.
„Gististaðir sem hljóta einn lykil eru einstakir á alla mælikvarða. Þar er hugsað út fyrir kassann, áhersla á óvenjulegar eða sjaldgæfar upplifanir og staðirnir í sérflokki hvað varðar gæði og aðbúnað. Þjónustan er alltaf framúrskarandi og fer dvöl á staðnum langt fram úr væntingum miðað við aðra í sama verðflokki,“ segir í tilkynningu frá Michelin.
Sérstaklega ánægjulegar viðurkenningar
„Þetta eru sérstaklega ánægjulegar viðurkenningar fyrir okkur, þar sem við höfum lagt mikinn metnað í uppbyggingu gæðagistiaðstöðu á síðustu árum. Áherslur okkar á sjálfbærni, hönnun, þjónustu og upplifanir hafa skilað sér í ánægðum viðskiptavinum hvaðanæva að úr heiminum,” segir Helga Árnadóttir, framkvæmdastjóri sölu, rekstrar og þjónustu hjá Bláa lóninu.
The Retreat by Blue Lagoon Iceland og Kerlingarfjöll Highland Base eru í eigu Bláa lónsins hf, sem stendur einnig fyrir uppbyggingu á fjölbreyttri aðstöðu og afþreyingu í Þjórsárdal.