Ákveðið hefur verið að kennsla á unglingastigi Barnaskólans á Eyrarbakka og Stokkseyri hefjist næstkomandu mánudag í félagsheimilinu Stað og í Rauða húsinu á Eyrarbakka.
Húsnæði Barnaskólans á Eyrarbakka var lokað í vikunni vegna myglu.
„Um er að ræða bráðabirgðaúrræði í aðstæðum sem áttu sér lítinn sem engan aðdraganda. Úrræðið verður notað á meðan vinna stendur yfir við að finna skólanum varanlegra bráðabirgðaúrræði,“ segir Páll Sveinsson, skólastjóri.
„Við stjórnendur og starfsfólk skólans gerum okkur grein fyrir því að þessar breytingar sem við stöndum frammi fyrir eru verulegt inngrip inn í skólastarfið og slíkt getur haft í för með sér vanlíðan og óvissu nemenda. Nýjar áskoranir fela gjarnan í sér ný og spennandi tækifæri. Við starfsmenn Barnaskólans á Eyrarbakka og Stokkseyri lítum svo á að þessar breytingar muni leiða af sér tækifæri á sama tíma og við leggjum áherslu á að halda áfram því faglega og skemmtilega skólastarfi sem unnið er í skólanum,“ segir Páll ennfremur.