Kennari í Fjölbrautaskóla Suðurlands hefur verið greindur með COVID-19.
Þetta kemur fram í tölvupósti sem Olga Lísa Garðarsdóttir, skólameistari, sendi á nemendur og forráðamenn í morgun.
Kennarinn veiktist í fyrrakvöld en kom ekki í skólann í gær. Fjölbrautaskóli Suðurlands var opinn í dag en eins og aðrir framhaldsskólar verður skólinn lokaður í fjórar vikur frá og með næsta mánudegi vegna samkomubannsins sem kynnt var í morgun.
Almannavarnir vinna nú að smitrakningu vegna kennarans og segir Olga Lísa að væntanlega verði haft samband við þá aðila sem kennarinn hefur haft samskipti við síðustu daga.