Reiðhjólaverkstæðið Keðjan flutti nýlega í nýtt og stærra húsnæði í Háheiði 13D á Selfossi.
Keðjan opnaði snemma í sumar í bílskúr í Laxabakka á Selfossi. Verkstæðinu óx mjög fljótt fiskur um hrygg en eftirspurnin eftir viðgerðum og varahlutum varð fljótt það mikil að bílskúrinn reyndist of lítill.
„Ég var nánast kominn með reiðhjól inn í hjónaherbergið,“ segir Guðmundur Örn Sverrisson, eigandi Keðjunnar, í léttu samtali við sunnlenska.is.
Með stærra húsnæði er mun rýmra fyrir alla starfsemi Keðjunnar, auk þess sem þar er nú komin lítil reiðhjólaverslun.
„Það munar öllu að vera kominn í stærra húsnæði. Verkstæðið stækkaði til muna og það er líka gaman að geta boðið upp á reiðhjól frá Cube sem eru vönduð reiðhjól frá Þýskalandi. Fólk er mjög ánægt með nýju aðstöðuna og kann að meta að hafa þjónustu eins og þessa í sínum heimabæ,“ segir Guðmundur enn fremur.