Kaupa leikhúsmiða fyrir tíundubekkinga

Bæjarráð Árborgar samþykkti í gærmorgun að kaupa miða á leiksýninguna Footloose hjá Nemendafélagi Fjölbrautaskóla Suðurlands, fyrir alla nemendur í 10. bekkjum grunnskóla Árborgar.

Bæjarráði hafði borist styrkbeiðni frá Nemendafélagi FSu vegna uppsetningarinnar og var í kjölfarið samþykkt að kaupa miða á leiksýninguna fyrir alla nemendur í 10. bekk í Árborg.

Bæjarráð lagði til við bæjarstjórn að samþykktur verði viðauki við fjárhagsáætlun vegna kostnaðar við miðakaupin.

Miðaverð á sýninguna er 2.500 krónur, svo ætla má að kostnaður við miðakaupin sé um það bil 300 þúsund krónur fyrir 120 tíundubekkinga.

Footloose var frumsýnt í menningarsalnum í Hótel Selfossi í gærkvöldi og fékk glimrandi viðtökur áhorfenda.