Rússneski stórmeistarinn Garry Kasparov, fyrrverandi heimsmeistari í skák, heimsótti Laugardælakirkju í dag og vitjaði grafar Bobby Fischer.
Einar S. Einarsson, einn meðlima RJF hópsins, stuðningsmannahóps Fischer, tók á móti Kasparov og flutti stutt ávarp inni í Laugardælakirkju. Síðan spilaði hann af tölvu eitt af uppáhalds lögum Fischer, lagið Green Green Grass of Home í flutningi Tom Jones.
Að því loknu ritaði Kasparov í minningarbók Fischers sem geymd er í Laugardælakirkju.
„Í minningu Robert J. Fischer, stærstu goðsagnarinnar í sögu skákíþróttarinnar. Ég vildi að við hefðum getað hist og unnið saman að vegsemd okkar ástkæra leiks. Garry Kasparov“
Eftir heimsóknina að Laugardælum kom Kasparov við í Fischer-setrinu á Selfossi þar sem meðal annars voru flutt erindi um Fischer og móður hans.
Kasparov ritar í minningarbók Fischer í Laugardælakirkju. sunnlenska.is/Guðmundur Karl