Undanfarin misseri hefur læðan Karamella vakið athygli viðskiptavina Krambúðarinnar á Selfossi. Þrátt fyrir að vera rétt rúmlega 1 árs hefur hún eignast marga vini á sinni stuttu ævi og er meira að segja búið að stofna Facebook-hóp, henni til heiðurs.
Karamella á það til að fara inn í Krambúðina, fylgja fólki á nammibarinn eða jafnvel hnupla harðfisk. Einnig hefur sést til hennar í sturtuklefum Sundhallar Selfoss og fyrir sumarfrí var Fjölbrautaskóli Suðurlands hennar vinsælasti áningarstaður. Margir telja að kisan sé týnd eða illa nærð en sannleikurinn er sá að hún á heimili þar sem ákaflega vel er hugsað um hana.
„Hún Karamella okkar elskar athygli, elskar að láta klappa sér og klóra. Hún er ótrúlega klár eins og til dæmis að opna glugga hérna heima. Hún hefur alltaf elskað fólk á öllum aldri og það skiptir hana engu máli þó það séu börn að hamast í henni,“ segir Þórunn Lilja Hilmarsdóttir, eigandi Karamellu, í samtali við sunnlenska.is.
FSu vinsælasti staðurinn
Þórunn Lilja segir að þegar Karamella var búin að kanna sitt nánasta umhverfi fór hún smám saman að stækka hringinn og hafa þau sótt hana á ótrúlegustu stöðum.
„Krambúðin hefur alltaf verið vinsælasti staðurinn enda fæ ég að heyra reglulega að viðskiptavinir kaupa handa henni mat þar og gefa henni. Við höfum nokkrum sinnum sótt hana í Sundhöllina þar sem henni langaði í sund, á bókasafnið, Vallaskóla, Bifröst, nýju Nettó búðina, heim til fólks og svo var FSu vinsælasti staðurinn fyrir sumarfrí.“
„Við fengum okkur aðra kisu til að veita Karamellu félagsskap því við förum reglulega vestur og þá er hún Karamella ein. Sú kisa er hálfu ári yngri og heitir Lakkrísmoli kallaður Moli,“ segir Þórunn Lilja en þess má geta að fjölskyldan býr í mínútu göngufjarlægð frá Krambúðinni.
Nemendur skólans elska Karamellu
Helga Dögg Sigurðardóttir er ritari í Fjölbrautaskóla Suðurlands. Hún segir í samtali við sunnlenska.is að Karamella hafi byrjað að venja komur sínar í skólann fyrir síðustu jól.
„Karamella er ansi tíður gestur, kemur flesta daga, nokkrar ferðir. Hún uppgötvaði fljótlega að hún gæti komist inn sjálf því skynjarinn á hurðinni hleypti henni inn. Ég held samt að það sé núna búið að laga það.“
„Hún má auðvitað ekki vera hjá okkur, heilbrigðiseftirlitið bannar dýr í skólanum. Þess vegna set ég hana alltaf út sunnan við hús þegar ég næ henni því þá kemst hún ekki rakleitt inn aftur. Og hún er svo góð og kelin að hún lætur alltaf ná sér.“
„Henni finnst voða gott að lauma sér í stólinn fyrir aftan mig og sefur stundum vært þar þegar ég sný mér við en ég setti upp þetta fína gestaspjót fyrir hana.“
„Nemendur skólans elska Karamellu og klappa henni enda er hún mjög skemmtileg kisa,“ segir Helga Dögg.
Alls ekki týnd eða svöng
Sem fyrr segir á Karamella gott heimili þar sem er vel hugsað um hana.
„Hún Karamella okkar er dýrkuð, dáð og dekruð svo fólk þarf ekki að hafa neinar áhyggjur af því að hún sé svöng. Hún fær nóg af þurrmat, blautmat og harðfiski hérna heima fyrir,“ segir Þórunn Lilja.
„Hún er alls ekki týnd og ratar flest allt, en ef ég fengi símhringingu að hún væri til dæmis hjá Bónus og þar í grennd þá mundi ég hiklaust ná í hana. Ég er ekki viss um að hún myndi rata þaðan. En hún er ekki týnd eða svöng og ég get svo sannarlega ekki kennt henni að drekka ekki úr drullupollum,“ segir Þórunn Lilja og hlær.
Sérstakur Facebook-hópur hefur verið stofnaður fyrir Karamellu. Hópurinn heitir „Hvar er Karamella núna?“ og þar getur fólk sett inn myndir af Karamellu og ævintýrum hennar um Selfossbæ.
Allt að átta símhringar á dag
Karamella er vel merkt með hálsól þar sem símanúmer Þórunnar Lilju kemur meðal annars fram. Þórunn Lilja fær daglegar símhringingar vegna Karamellu.
„Á góðum degi fáum við eina til tvær símhringingar út af henni. Oftast eru það þó í kringum fimm til átta hringingar þar sem fólk spyr ekki hvort hún sé týnd eða svöng heldur stendur fast á því að hún sé svöng og týnd og hefur miklar áhyggjur af henni. Ég biðla til fólks að vera ekki að kaupa mat handa henni í Krambúðinni svo hún kannski fækki komum sínum þangað. Starfsfólk Krambúðarinnar er orðið þreytt á henni þó þau dýrki hana líka.“
Engin venjuleg kisa
Þórunn Lilja margar skemmtilegar sögur af Karamellu enda uppátækjasöm með eindæmum.
„Karamella elskar bíla svo ef við erum á ferðinni og sjáum hana þá stoppum við og köllum á hana og hún hleypur upp í bíl og er eins og hundur allan tímann að skoða umhverfið.“
„Hún hefur mætt i podcast hjá FSu, það er til video af henni að ræna harðfisk í Krambúðinni og það má enginn leggja bílnum sinum hérna heima og skilja eftir opna hurð eða skott, þá er hún mætt inn í bílinn.“
„Hún Karamella okkar er bara athyglissjúk, skemmtilegur karakter og svo yndislega blíð og góð svo ég skil vel að fólk hafi svona miklar áhyggjur af henni en það er i alvörunni algjör óþarfi,“ segir Þórunn Lilja að lokum.