Uppbygging vatnsveitu við Kaldárhöfða í Grímsnes- og Grafningshreppi er eitt stærsta og mikilvægasta vatnsöflunarverkefni sem ráðist hefur verið í á Suðurlandi. Markmiðið með verkefninu er að byggja upp sameiginlega vatnsveitu fyrir Grímsnes- og Grafningshrepp, Árborg og Flóahrepp sem geti flutt allt að 500 sekúndulítra af köldu neysluvatni.
Með því yrði Kaldárhöfðaveita langstærsta vatnsveita á Suðurlandi og lykilinnviður næstu 100 árin.
Borun tilraunaholu við Kaldárhöfða lauk í maímánuði. Framkvæmdir gengu vel og fyrstu vísbendingar gáfu góð fyrirheit um að holan geti skilað miklu vatni. Verkefnið er þó enn á rannsóknarstigi og endanlegar ákvarðanir verða teknar á grundvelli mælinga, faglegs mats og nauðsynlegrar leyfisvinnu.
„Fyrstu vísbendingar gefa tilefni til bjartsýni og benda til þess að á Kaldárhöfða kunni að vera umtalsvert magn af köldu grunnvatni. Nú bíðum við þess að fá dælu á svæðið svo hægt verði að hefja dæluprófanir. Þær munu gefa okkur mun skýrari mynd af afkastagetu vatnsbólsins og ráða miklu um næstu skref verkefnisins,“ segir Fjóla St. Kristinsdóttir, sveitarstjóri, í samtali við sunnlenska.is.
Verkefnið er unnið af Grímsnes- og Grafningshreppi í samstarfi við Sveitarfélagið Árborg og Flóahrepp. Kaldárhöfði er talinn sérstaklega áhugaverður kostur vegna þess að þar eru þekktar vatnsmiklar lindir og jarðfræðilegar aðstæður sem benda til öflugs grunnvatnsstraums undir hrauninu. Um er að ræða víðfeðmt og lítt raskað svæði þar sem aðstæður til að tryggja vatnsvernd eru góðar.
„Ég tel að Kaldárhöfðaverkefnið sé eitt mikilvægasta sameiginlega innviðaverkefni sem sveitarfélög á Suðurlandi hafa ráðist í. Ef niðurstöður dæluprófananna verða jákvæðar erum við ekki aðeins að tryggja vatnsöryggi fyrir sveitarfélögin þrjú, heldur einnig að leggja grunn að áframhaldandi uppbyggingu samfélags og atvinnulífs á Suðurlandi til næstu áratuga,“ bætir Fjóla við að lokum.