Björgunarsveitir frá Höfn til Víkur voru kallaðar út rétt eftir klukkan fjögur í dag þegar neyðarkall barst frá kajakræðara sem var í vandræðum eftir að hafa fengið á sig brot. Var hann þá staddur utan við Meðallandssand.
Björgunarsveitir fóru af stað á landi og sjó og einnig var þyrla Landhelgisgæslunnar kölluð til. Skömmu síðar bárust upplýsingar um að ræðarinn gæti verið kominn upp á land og voru þær upplýsingar staðfestar rétt í þessu. Hann var þá staddur skammt austur af Skarðsfjöruvita í Meðallandsfjöru.
Reyndist hann heill á húfi þegar að var komið. Björgunarsveitum hefur því verið snúið til baka.