Jónína ráðin aðstoðarskólastjóri

Jónína Magnúsdóttir hefur verið ráðin aðstoðarskólastjóri við Grunnskólann í Þorlákshöfn. Þrjár umsóknir bárust um starfið.

Eftir umsóknarferlið var Jónína metin hæfust umsækjenda, en hún er skólastjóri Grunnskóla Fjallabyggðar.

Jónína hefur verið í skólastjórnun frá árinu 1998 en hún var áður skólastjóri og aðstoðarskólastjóri Grunnskóla Siglufjarðar. Þá var hún einnig skólafulltrúi Siglufjarðarbæjar í tvö skólaár. Jónína er að auki með góða kennslureynslu en hún hóf störf við kennslu haustið 1987 og starfaði sem kennari við Snælandsskóla í Kópavogi og við Grunnskóla Siglufjarðar.

Jónína útskrifaðist með B.Ed gráðu frá Kennaraháskóla Íslands árið 1987 auk þess sem hún lauk Dipl. Ed gráðu í uppeldis- og menntunarfræði með áherslu á stjórunun menntastofnana frá sama skóla árið 2005. Í vor lauk Jónína MCM meistaragráðu í menningarstjórnun frá Háskólanum á Bifröst.

Jónína er fædd árið 1963 og er gift Ragnari Aðalsteinssyni. Þau eiga tvo uppkomna syni og eitt barnabarn. Jónína mun hefja störf við Grunnskólann á haustmánuðum.