Framkvæmdir við gatnagerð á Víkursandi, iðnaðarsvæði vestan við Þorlákshöfn, munu hefjast í vikunni. Jón og Margeir ehf. í Grindavík munu sjá um verkið en lægsta tilboði í útboðinu var hafnað.
Sex tilboð bárust í verkið og reyndust þau öll undir kostnaðaráætlun Sveitarfélagsins Ölfuss sem var 423,8 milljónir króna. JJ pípulagnir ehf. og Jarðtækni ehf stóðu saman að lægsta tilboðinu sem barst, 305,7 milljónum króna, en þar sem annað fyrirtækið uppfyllti ekki kröfur útboðsins hafnaði framkvæmda- og hafnarnefnd Ölfuss tilboðinu.
Tilboð Jóns og Margeirs ehf hljóðaði upp á 329,9 milljónir króna og er 77,8% af áætluðum verktakakostnaði sveitarfélagsins.
Önnur tilboð sem bárust voru frá Aðalleið 335,4 milljónir króna, Stórverk bauð 355,8 milljónir, Ellert Skúlason 391,5 milljónir og Berg verktakar 409,4 milljónir króna.
Víkursandur er í um þriggja kílómetra fjarlægð frá byggðinni í Þorlákshöfn. Þar er gert ráð fyrir matvælaiðnaði ýmiskonar, t.a.m lyktarmengandi iðnaði ásamt annarri athafnarstarfsemi. Deiliskipulag af Víkursandi tekur til ellefu iðnaðarlóða á um 45 hektara svæði meðfram Suðurstrandavegi.