Forsetaframbjóðendur eru farnir að bregða undir sig betri fætinum og í dag heimsótti Jón Gnarr Selfoss en það var fyrsta skipulagða ferð hans út á land í kosningabaráttunni.
Jón byrjaði daginn á því að hvetja keppendur í Grýlupottahlaupinu áður en hann brá sér í miðbæinn, heilsaði upp á kjósendur og steig svo á stokk með Fóstbróður sínum, Sigurjóni Kjartanssyni. Frumfluttu þeir meðal annars kosningalag Jóns, sem er nýr texti við Tvíhöfðalagið Gefum honum von.
Jón skoðaði svo miðbæinn á Selfossi undir leiðsögn Fjólu Kristinsdóttur bæjarstjóra og lauk heimsókninni í Skyrlandi í Mjólkurbúi Flóamanna.
