Selfyssingar og nærsveitungar kvöddu jólin með glæsilegri þrettándagleði í kvöld. Þrátt fyrir kulda og gjólu viðraði ágætlega til brennuhalds og flugeldasýningar enda var mikið fjölmenni á svæðinu.
Farin var fjölmenn blysför frá Tryggvaskála að brennustæði við tjaldstæði Gesthúsa þar sem kveikt var í þrettándabálkesti. Björgunarfélag Árborgar ásamt Ungmennafélagi Selfoss sáu svo um stórglæsilega flugeldasýningu af Fjallinu eina.
Bræðurnir þrettán úr Ingólfsfjalli voru að sjálfsögðu á svæðinu ásamt álfum og tröllum og kvöddu þeir krakkana með flugeldahvelli áður en haldið var til fjalla.
