Nú er svo komið að íbúafjölgun á Selfossi og nágrenni er orðin svo mikil að jólasveinarnir í Ingólfsfjalli treysta sér ekki lengur til að halda úti pakkaþjónustu á aðfangadag. Dagurinn dugar sveinunum þrettán ekki lengur til að komast yfir allan þann fjölda heimsókna sem óskað hefur verið eftir undanfarin ár.
„Þeir hafa ekkert verið á ferðinni þessi tvö ár sem Covid hefur geisað og síðan fyrir Covid hefur íbúum fjölgað enn meira. Það er ekki gott að þurfa að velja úr hverjum þeir geti sinnt og hverjum ekki og það er alls ekki hægt að vera að koma í heimsókn þegar fjölskyldur eru sestar við borðhald og búið að hringja inn jólin kl. 18,“ segir í tilkynningu frá Ungmennafélagi Selfoss, sem haldið hefur utan um heimsóknirnar fyrir hönd bræðranna í Ingólfsfjalli um áratuga skeið.
Sveinarnir eru þó ekki af baki dottnir og munu að sjálfsögðu halda í hefðina og heimsækja Selfyssinga með árlegri innkomu í miðbæinn næstkomandi laugardag, þann 10. desember kl. 16. Þar ætla þeir að heilsa upp á börnin, syngja og koma öllum í réttu jólastemninguna.
Í framhaldinu eru þeir svo æstir í að koma í heimsóknir í skóla, leikskóla og fyrirtæki á Selfossi og má fá nánari upplýsingar um þá þjónustu í síma 482 4822 eða 782-3465 eða með tölvupósti á netfangið umfs@umfs.is.