Sveitarfélagið Árborg býður íbúum og gestum að taka þátt í hátíðlegri stund í miðbæ Selfoss þegar kveikt verður á jólaljósum sveitarfélagsins og jólatrénu á Brúartorgi. Dagskráin fer fram á fimmtudaginn 19. nóvember og markar upphaf aðventunnar í Árborg.
Jólatónlist og aðventustemning verður í miðbænum frá kl. 17:00 og verslanir með ýmis tilboð í gangi. Dagskráin hefst kl. 17:50 þegar Barna- og unglingakór Selfosskirkju flytur fallega jólatóna undir stjórn Bergþóru Kristínardóttur.
Rétt fyrir klukkan sex flytur Bragi Bjarnason bæjarstjóri ávarp og telur niður með viðstöddum þegar kveikt verður á jólatrénu í miðbæ Selfoss.
Að lokinni athöfn tekur við jólaljósakvöld á Selfossi þar sem fjölmargar verslanir og veitingastaðir verða með opið til kl. 21:00. Gestum gefst því gott tækifæri til að njóta hátíðarstemningarinnar, versla og eiga notalega stund með fjölskyldu og vinum.
Sveitarfélagið Árborg hvetur íbúa og gesti til að mæta á Brúartorg og gleðjast saman í upphafi jólaundirbúnings.
