Fréttir

Jólaljós á Jóruhlaupi

21. desember 2012 18:01

Jólaljós voru sett upp á Jóruhlaupi í Ölfusá í dag. Í stærri klettinum er sjálfsáð jólatré sem orðið er meira en þriggja metra hátt og það voru tveir framtakssamir Selfyssingar sem hrintu þeirri hugmynd í framkvæmd að setja ljósaseríu á tréð.

Þeir Hallur Karl Hinriksson og Daníel Gunnarsson höfðu kastað þessari hugmynd á milli sín og settu sig í samband við Sveitarfélagið Árborg sem kostaði verkefnið og Björgunarfélag Árborgar sem sá um að setja upp skreytinguna. Blaðamaður Sunnlenska slóst með í ferðina og festi hana á filmu.

Óhætt er að segja að ljósin setji skemmtilegan svip á ána og vonast Hallur Karl, sem fylgdist með aðgerðunum á árbakkanum, að þetta verði að árlegum sið á aðventunni.

Eftir að hafa sett upp seríuna og tengt hana rafgeymi notaði björgunarfélagsfólkið ferðina til æfingar á straumvatnsbjörgun í ánni.

Myndirnar hér að neðan tala sínu máli.

sunnlenska.is/Guðmundur Karl