Jólakötturinn í útrýmingarhættu

Í Hveragerði er nú hafið átak í útrýmingu villikatta en ítrekaðar kvartanir hafa borist frá íbúum vegna þeirra að undanförnu.

Dýraeftirlitsmaðurinn í Hveragerði mun leggja sérstaka áherslu á svæðið í kringum Breiðumörk og Heiðmörk en þaðan hafa flestar kvartanir borist.

Í samþykkt um kattahald sem gildir í Hveragerði segir að kattaeigendum beri skylda til að láta örmerkja ketti sína eða auðkenna varanlega með húðflúri í eyra. Héðan í frá mun dýraeftirlitsmaður taka ljósmyndir af þeim ómerktu dýrum sem hann fangar og setja á heimasíðu bæjarins.

Jólakötturinn mun því væntanlega sneiða framhjá Hveragerðisbæ þetta árið, burtséð frá því hvort Hvergerðingar fái allir nýja flík fyrir jólin.