Í gær fóru nemendur í 7. og 8. bekk Hvolsskóla á Hvolsvelli að Sólheimajökli til að mæla hop hans á árinu. Mælingar nemendanna hafa staðið yfir árlega síðan haustið 2010.
Ástæða þess að tveir bekkir fóru núna er sú að í fyrra komst 7. bekkur ekki vegna ýmissa ástæðna. Í fyrra fóru nokkrir nemendur ásamt Stjörnu-Sævari og framkvæmdu mælingu fyrir árið 2020.
Í för með hópnum í gær slóst Sigrún Stefánsdóttir, dósent við Háskólann á Akureyri ásamt norrænum blaðamönnum. Jón Stefánsson fyrrum verkefnastjóri Grænfánans við Hvolsskóla var einnig með í för en hann hefur verið við mælingarnar frá upphafi. Venju samkvæmt aðstoðaði Björgunarsveitin Dagrenning við verkið.
Í ár mældist hop jökulsins 11 metrar frá árinu 2020 og hefur hann því hopað um 408 metra frá því að mælingar hófust haustið 2010.