Nýtt Jóga Nídra námskeið hefst næstkomandi fimmtudag hjá Hugform á Selfossi.
„Nídra þýðir svefn og Jóga Nídra má þýða sem jógískan svefn eða liggjandi hugleiðslu. Þú ert leiddur inn í mjög djúpa slökun þar sem þú nærð að aftengja þig frá allri spennu, álagi og streitu,“ segir Rósa Traustadóttir, sem kennir Jóga Nídra hjá Hugform.
„Jóga Nídra er hugleiðsluaðferð sem auðvelt er að ná tökum á, þar sem þú þarft ekki annað en að leggjast í þægilega stöðu og hlusta. Við flæðum inn í slökun sem veitir líkama og huga kyrrð og frið, og komum tilbaka full af orku og ánægju,“ segir Rósa.
Að sögn Rósu vinnur Jóga Nídra gegn streitu og þreytu sem einkennir oft nútíma samfélag. „Streita og streitutengd vandamál eru undirliggjandi þáttur í mörgum sjúkdómum. Jóga Nídra hefur reynst mjög vel fyrir þá sem eiga við svefnerfiðleika að stríða, fyrir þá sem eru að takast á við álag og spennu og fyrir þá sem einfaldlega vilja ná að kyrra hugann og öðlast meiri orku,“ segir Rósa að lokum.