Jarðtækni ehf. í Kópavogi átti lægsta tilboðið í gatna- og stígagerð við Borg í Grímsnesi sem boðin var út á dögunum. Ellefu tilboð bárust í verkið og var tilboð Jarðtækni það eina sem var undir kostnaðaráætlun.
Tilboð Jarðtækni hljóðaði upp á 109,3 milljónir króna en kostnaðaráætlun sem Efla vann fyrir Grímsnes- og Grafningshrepp er 116,4 milljónir króna.
Tíu önnur tilboð bárust í verkið; Steinvélar buðu 118,0 milljónir króna, Suðurtak 119,2 milljónir, Borgarverk 125,7 milljónir, Gröfutækni 130,1 milljónir, Magnús I. Jónsson 137,5 milljónir, Stórverk 141,5 milljónir, Óskatak 157,8 milljónir, Stjörnugarðar 158,2 milljónir, Fagurverk 158,8 milljónir og JÞ verk 176,7 milljónir króna.
Verkið felur í sér gerð á nýjum götum og stígum í nýja hverfinu við borg Borg en um er að ræða nýjan botnlanga, Skógartún, áframhald af stofngötu og stíga í kringum hverfið.
Verkinu á að vera lokið þann 1. október næstkomandi.