Sveitarstjórn Flóahrepps samþykkti ársreikning ársins 2025 á fundi sínum í gær. Rekstrarniðurstaða ársins var jákvæð, bæði í A-hluta og í samstæðu A og B hluta. Heildartekjur námu 1.512 milljónum króna og var afgangur af rekstri í A og B hluta 234,4 milljónir króna.
„Þessi árangur endurspeglar sterka og ábyrga rekstrarstjórn. Veltufé frá rekstri nam 202,9 milljónum króna í A og B hluta, sem skapar mikilvægt svigrúm til framtíðaruppbyggingar og fjárfestinga í þágu íbúa,“ segir í tilkynningu frá sveitarstjórn.
Á árinu var fjárfest fyrir 146 milljónir króna í innviðum, meðal annars vatnsveitu, breytingum á íþróttasal í Þingborg, endurbótum í Þjórsárveri og framkvæmdum á skólalóð Flóaskóla. Allar þessar fjárfestingar voru fjármagnaðar með rekstrarafgangi, án lántöku.
Efnahagsreikningur Flóahrepps sýnir að bókfært verð eigna sveitarfélagsins nam 1.579,1 milljón króna í árslok, og eigið fé 1.249,8 milljónir króna. Skuldir og skuldbindingar voru samtals 329,3 milljónir króna, sem telst hóflegt miðað við umfang. Rekstrarjöfnuður síðustu þriggja ára (2023–2025) er jákvæður, sem staðfestir stöðugleika til lengri tíma. Einnig hefur tekist að halda launakostnaði vel í skefjum; hlutfall launa og launatengdra gjalda var 46,9% af tekjum, undir áætluðum 49,8%.
„Sveitarstjórn Flóahrepps lýsir mikilli ánægju með niðurstöður ársins og telur þær sýna skýrt að sveitarfélagið hefur burði til að sinna lögbundnum verkefnum sínum og halda áfram að byggja upp öflugt samfélag. Sterkt veltufé frá rekstri gefur svigrúm til áframhaldandi uppbyggingar innviða og þjónustu við íbúa,“ segir ennfremur í tilkynningunni þar sem sveitarstjórnin segist skilja sátt við kjörtímabilið auk þess sem stjórnendum og starfsfólki er þakkað sérstaklega fyrir faglegt og ábyrgt starf sem hefur skilað þessum góða árangri.