JAE ehf., sem á og rekur meðal annars Hótel Selfoss, hefur gengið frá kaupum á Hótel South Coast, sem er nýlegt hótel við Eyraveginn á Selfossi.
„Þessi kaup eru í samræmi við trú eigenda á því að ferðaþjónustan á Suðurlandi muni halda áfram að styrkjast á komandi árum,“ segir Aðalsteinn Jónsson Þorsteinsson, einn eigendanna. „Við munum áfram leita tækifæra á þessu svæði sem styðja við langtímaáætlanir okkar og vöxt.“
Hótel South Coast er vandað með 74 herbergjum, veitingaaðstöðu, heilsulind, líkamsræktaraðstöðu og fundarrýmum, sem gerir það að eftirsóttum ferðamannastað á Suðurlandi.
Með þessum kaupum styrkir JAE ehf. stöðu sína verulega á sunnlenska ferðamarkaðnum en félagið rekur nú þegar Hótel
Selfoss og Hótel Vestmannaeyjar, ásamt fasteignum sem tengjast þeim rekstri. Um er að ræða hótelstarfsemi með samtals yfir 300 herbergi á Suðurlandi. Auk þess leigir JAE út íbúðir og einbýlishús í Vestmannaeyjum, sem hluta af starfsemi sinni. Með þessum nýju kaupum nemur heildarfermetrafjöldi fasteigna í eigu félagsins um 16.000 fermetrum.
Björgvin Jóhannesson, hótelstjóri Hótel Selfoss, mun einnig verða hótelsstjóri Hótel South Coast.