Landsvirkjun hefur gengið frá samningum við tvo verktaka vegna stækkunar Sigöldustöðvar, að undangengnu útboðsferli.
Annars vegar Ístak vegna byggingar helstu mannvirkja vegna stækkunarinnar og hins vegar þýska fyrirtækið DSD Noell GmbH vegna rista, loka og fallpípu.
Samningurinn við Ístak kveður á um tæplega 7,5 milljarða kr. greiðslu fyrir verkið og samningurinn við DSD Noell tæpa 2 milljarða, eða samtals um 9,5 milljarða kr. Upphæðir eru án virðisaukaskatts.
Ístak bauð lægst í byggingu mannvirkja, en kostnaðaráætlun Landsvirkjunar var rúmir 6,7 milljarðar kr. Verkið felur í sér byggingu helstu mannvirkja vegna stækkunar Sigöldustöðvar. Reist verður viðbygging við núverandi stöðvarhús fyrir nýja 65 MW vélasamstæðu sem og ný innsteypt þrýstipípa frá inntaki að stöðvarhúsi. Auk þess felur verkið í sér gerð tímabundinnar varnarstíflu sem og breikkun frárennslisskurðar næst stöðvarhúsinu.
Eins verða gerðar umfangsmiklar endurbætur á núverandi stöðvarhúsi sem og uppfærsla á núverandi húskerfum, svo sem rafmagns-, vatns-, fráveitu-, loftræsti-, brunavarna- og öryggiskerfum. Verkið er lykilþáttur í stækkun Sigöldustöðvar og markar undirritun samningsins upphaf meginframkvæmda sem auka uppsett afl stöðvarinnar úr 150 MW í 215 MW.
DSD Noell bauð lægst í hönnun, framleiðslu, flutning, uppsetningu og prófanir á ristum, lokum og fallpípu ásamt tilheyrandi búnaði. Tilboðið nam tæpum 2 milljörðum kr. en kostnaðaráætlun Landsvirkjunar var rúmlega 1,7 milljarðar kr. Búnaðurinn verður afhentur fulluppsettur og er ætlaður til að tryggja öruggan, áreiðanlegan og hagkvæman rekstur virkjunarinnar til langs tíma.
Verkið er lykilþáttur í stækkun Sigöldustöðvar og markar mikilvægan áfanga í uppbyggingu þeirra innviða sem gera kleift að bæta við fjórðu vélasamstæðunni. Ný vél verður tekin í notkun um áramótin 2029/2030.