Brotist var inn í áhorfendastúkuna á Selfossvelli í síðustu viku og þar unnin skemmdarverk.
Stúkan er í byggingu og þeir sem þar fóru inn brutu járnrimla í loftræstiinntaki og brutu spónaplötur. Talið er að verknaðurinn hafi átt sér stað að kvöldi síðastliðins miðvikudags eða aðfaranótt fimmtudags.
Snemma í síðustu viku var Phoenix svörtu og gylltu fjallareiðhjóli stolið úr reiðhjólageymslu að Eyravegi 50 á Selfossi.
Lögregla biður þá sem veitt geta upplýsingar um skemmdarverkin og þjófnaðinn að hafa samband í síma 480 1010.