Innbrot í Vaðnesi upplýst

Fólkið sem handtekið var fyrir utan verslun Krónunnar á Selfossi í gær hefur játað á sig innbrot í sumarbústað í Vaðnesi sem tilkynnt var um í fyrradag.

Eins og greint var frá í morgun var fólkið handtekið við verslun Krónunnar á Selfossi þar sem karlinn hljóp með þýfi úr Krónunni í hendur lögreglu fyrir utan verslunina.

Lögreglumenn höfðu verið að svipast um eftir bíl sem parið var á eftir að hafa fengið ábendingu frá lögreglunni á höfuðborgarsvæðinu vegna fyrri afskipta af fólkinu og hugsanlegra innbrota þeirra.

Við leit í bifreið parsins fundust munir sem tilheyrðu innbroti í sumarbústað í Vaðnesi sem tilkynnt var um í fyrradag. Parið viðurkenndi að hafa brotist inn í sumarbústaðinn og annan til þar skammt frá.

Nokkrar húsleitir voru gerðar á Eyrabakka í tengslum við þetta mál og einnig vegna innbrota undanfarið í fyrirtæki í Gagnheiðinni. Ekkert fannst í húsleitunum sem sem hægt var að tengja við þau innbrot.

Lögregluembættin á Selfossi og á höfuðborgarsvæðinu hafa unnið náið saman við eftirlit á sumarbústaðasvæðum og skipst á upplýsingum sem í þessu tilviki leiddi til þess að innbrot í sumarbústaðina í Vaðnesi upplýstust.

Auk innbrotsins og gripdeildarinnar í Krónunni var konan kærð fyrir akstur undir áhrifum fíkniefna.