Fimm framboð bárust í prófkjöri Sjálfstæðisflokksins í Rangárþingi ytra sem fram fer næstkomandi laugardag. Tveir gefa kost á sér í 1. sætið.
Útlit er fyrir breytingar á D-listanum frá því í síðustu kosningum en einn af þremur sveitarstjórnarfulltrúum listans gefur kost á sér í prófkjörinu.
Hellubúinn Ingvar Pétur Guðbjörnsson, oddviti D-listans og upplýsingafulltrúi Sjálfstæðisflokksins, sækist eftir 1. sæti og Guðmar Aubertsson, dýralæknir á Hellu, býður sig fram í 1.-2. sæti.
Þröstur Sigurðsson, framkvæmdastjóri á Hellu, stefnir á 3.-4. sæti og Sóley Margeirsdóttir, grunnskólakennari á Ytrivelli í Landsveit, býður sig fram í 3.-5. sæti. Þá gefur Gyða Árný Helgadóttir, fjámálastjóri í Húnakoti í Þykkvabæ, kost á sér í prófkjörinu en tilgreinir ekki hvaða sæti hún sækist eftir.
Kosningin í prófkjörinu fer fram í Menningarsalnum á Hellu frá kl. 10 til 16 á laugardaginn. Allir flokksbundnir Sjálfstæðismenn í sveitarfélaginu, 15 ára og eldri geta kosið.