Þau tímamót urðu um síðustu mánaðarmót að Ingibjörg Einarsdóttir á Langsstöðum lét af störfum hjá eftir 32 ára farsælt starf sem húsvörður hjá Flóahreppi og áður Hraungerðishreppi. Inga fagnar 70 ára afmæli í maí.
Inga hefur sinnt störfum sínum af metnaði og alúð og ávallt verið reiðubúin að bregðast við öllu því sem snýr að félagsheimilinu Þingborg. Sennilega þekkir enginn húsnæði Þingborgar eins vel og Inga, enda hefur hún verið við störf frá því að félagsheimilið var tekið í notkun.
„Störf hennar eru ómetanleg fyrir sveitarfélagið og samfélagið okkar og eru henni færðar innilegustu þakkir fyrir sín störf öll þessi ár,“ segir í tilkynningu frá Flóahreppi en við þessi tímamót færði sveitarstjórn Ingu gjöf og þakklæti fyrir störf sín.
Þrátt fyrir að Inga hafi lagt húslyklana á hilluna þá situr hún ekki auðum höndum þessa dagana enda allt á fullu í sauðburði og vorverkum á Langsstöðum.