Inga Sigrún stefnir á 1. sætið

Inga Sigrún Atladóttir, forseti bæjarstjórnar í Sveitarfélaginu Vogum, hefur ákveðið að gefa kost á sér í 1. sæti á lista Vg í Suðurkjördæmi í næstu alþingiskosningum.

Inga Sigrún er nýlega gengin til liðs við flokkinn en hún hefur starfað lengi innan Samfylkingar.

“Ég yfirgaf Samfylkinguna vegna þess að framkvæmd stefnu flokksins tekur að mínu mati ekki mið af umhverfissjónarmiðum og berst ekki gegn sterkri stöðu einokunar- og stórfyrirtækja á kostnað hagsmuna almennings. Þessi tvö sjónarmið tel ég vinna gegn þeim jöfnuði sem ég vil berjast fyrir í samfélaginu og var því ljóst að hugmyndafræðilega á ég samleið með Vinstri Hreyfingunni Grænu framboði,” segir Inga Sigrún í fréttatilkynningu sem hún sendi frá sér í dag.

“Ég hef beitt mér í opinberri umræðu um umhverfismál síðan 2006 auk þess sem ég hef lengi barist fyrir gagnsæi og heiðarlegri leikreglum í samfélaginu. Ég hef starfað sem kennari og deildarstjóri og hef leitt fjölmörg þróunarverkefni sem snúa að aukinni víðsýni, umhverfismálum og baráttu gegn einelti í skólakerfinu. Baráttan gegn leyndarhyggju og andfélagslegri samfélagslegri hegðun hefur mótað minn starfsferil og skrifaði ég m.a. meistararitgerð um stjórnunarhætti sem stuðla að víðsýni og vinna gegn einelti,” segir Inga Sigrún ennfremur.

Hún hefur verið oddviti H-lista, óháðra borgara í sveitarstjórn í Vogum síðan 2006 og forseti bæjarstjórnar síðan 2010. Hún situr í stjórn sambands sveitarfélaga á Suðurnesjum, Vinnumarkaðsráði Suðurnesja og stjórn Miðstöðvar símenntunar á Suðurnesjum.