Hjónin Inga Lára Baldvinsdóttir og Magnús Karel Hannesson hlutu menningarviðurkenningu Árborgar árið 2025 en viðurkenningin var veitt við hátíðlega athöfn á Byggðasafni Árnesinga í gær.
Viðurkenningin var veitt fyrir fullu húsi í kjölfarið á vel lukkuðum viðburði þeirra hjóna, þar sem þau sögðu frá nýútkominni bók um horfin hús á Eyrarbakka, rannsóknarvinnu sinni og niðurstöðum.
Í tilkynningu frá Sveitarfélaginu Árborg segir að Inga Lára og Magnús Karel séu vel að þessum heiðri komin. Þau hafi á undanförnum áratugum auðgað menningarlíf í sveitarfélaginu svo sómi er að. Þar má nefna ljósmyndasýningar, sögugöngur, bókaútgáfu og síðast en ekki síst rekstur Laugabúðar, og er þó alls ekki allt upp talið.
Það var einróma ákvörðun bæjarráðs Árborgar að veita þeim hjónum þessa viðurkenningu í ár og þakka þeim um leið fyrir þeirra ómetanlega menningarstarf í þágu samfélagsins. Verðlaunagripurinn var handtálguð heiðlóa eftir myndlistarmanninn Hafþór Ragnar Þórhallsson.
