Ingimar Guðmundsson, sérfræðingur hjá Sambandi íslenskra sveitarfélaga, verður bæjarstjóraefni D-listans í Hveragerði í komandi sveitarstjórnarkosningum.
Ingimar er 32 ára, fæddur og uppalinn í Hveragerði og býr þar í dag ásamt eiginkonu sinni og þremur börnum.
Í tilkynningu frá D-listanum segir að Ingimar hafi á undanförnum árum öðlast víðtæka reynslu af málefnum sveitarfélaga, bæði í gegnum starf sitt hjá Sambandinu og sem forstöðumaður frístundamála í Hveragerði. Þar leiddi hann uppbyggingu sem vakti athygli á landsvísu og var starfsemin meðal annars tilnefnd til íslensku menntaverðlaunanna. Í starfi sínu hefur Ingimar unnið náið með sveitarfélögum, ráðuneytum og fagstofnunum að fjölbreyttum verkefnum sem snúa að þróun þjónustu og stjórnsýslu.
„Mér þykir einstaklega vænt um sveitarfélagið og er staðráðinn í því að láta gott af mér leiða,“ segir Ingimar. „Ég vil bæta gæði þjónustu, efla gagnsæi og tryggja að uppbygging sveitarfélagsins verði í takt við íbúa. Fái D-listinn umboð í komandi sveitarstjórnarkosningum til að starfa í þágu bæjarbúa munum við byggja á skýrri sýn um faglega og ábyrga stjórnun sveitarfélagsins þar sem ákvarðanir eru teknar á grundvelli heildarstefnu, raunhæfra forsendna og skýrrar forgangsröðunar.“