Reykræsta þurfti hluta Vallaskóla á Selfossi í morgun eftir að nemandi kveikti í klósettrúllustandi inni á salerni í skólanum.
Íkveikjan átti sér stað eftir að Brunavarnir Árnessýslu höfðu æft rýmingu skólans með starfsfólki og nemendum fyrr í morgun.
Æfingin gekk vel en að henni lokinni fór viðvörunarkerfi í gang þar sem boð bárust um eld inni á salerni í þeim hluta skólans sem hýsir eldri nemendur. Greiðlega gekk að rýma skólann aftur og nemandi náði að slökkva eldinn með handslökkvitæki.
Nemendur skólans voru kallaðir á sal eftir þetta atvik þar sem rætt var við þá um alvarleika þess að kveikja í.