Liðið Icebreakers úr Grunnskóla Hornafjarðar sigraði í Stóru LEGO-keppni grunnskólanna, FIRST® LEGO® League Ísland sem fram fór í Háskólabíói síðastliðinn laugardag.
Alls var 21 lið frá sautján grunnskólum víðs vegar af landinu skráð til þátttöku í keppnina, samtals nærri 200 þátttakendur. Þema LEGO-keppninnar í ár var BIOGLOW eða lífljómi og tengdist líffræðilegri fjölbreytni og tengslum lífvera í vistkerfum. Liðin höfðu undirbúið sig fyrir keppnina undanfarnar vikur og mánuði undir leiðsögn þjálfara sinna og á þeim tíma rannsakað áskoranir sem tengjast lífríkinu, þróað eigin nýsköpunarhugmyndir og hannað og forritað LEGO-vélmenni til þátttöku í vélmennakappleik.
Liðin voru metin út frá ýmsum þáttum, eins og nýsköpunarverkefninu sem þau unnu, hönnun og þróun vélmennis og frammistöðu í vélmennakappleik auk liðsheildar. Þegar stigagjöf í einstökum þátttum keppninnar hafði verið tekin saman kom í ljós að liðið Icebreakers úr Grunnskóla Hornafjarðar varð hlutskarpast. Í viðurkenningarskyni fékk liðið forláta bikar úr LEGO-kubbum og 300 þúsund krónur í verðlaunafé. Jafnframt býðst liðinu að taka þátt í alþjóðlegum mótum FIRST® LEGO® League en keppnin nær til meira 110 landa um heim allan.
Þetta voru ekki einu verðlaun Hornfirðinga því liðið Icecoders sigraði í vélmennakappleiknum og fékk sömuleiðis 1. verðlaun fyrir besta nýsköpunarverkefnið.

Þetta var síðasta keppnin undir merkjum FIRST LEGO League hér á landi en í stað hennar kemur ein stærsta alþjóðlega vélmenna- og STEM-keppni heims, World Robot Olympiad (WRO), sem verður hér á landi í fyrsta sinn vorið 2027. Þar opnast ný tækifæri fyrir ungt fólk í grunnskólum, framhaldsskólum og háskólum til að hanna, smíða, forrita og vinna saman að lausnum.
Háskóli Íslands hefur haldið utan um Stóru LEGO-keppni grunnskólanna í yfir tvo áratugi með stuðningi ýmissa fyrirtækja. Líkt og undanfarin ár var Verkfræðingafélag Íslands helsti bakhjarl keppninnar og á stóran þátt í að gera þessa spennandi keppni að veruleika.
