Einbýlishús við Heiðarveg á Selfossi skemmdist mikið í eldsvoða á tíunda tímanum í morgun.
Einn var inni í húsinu þegar eldurinn kom upp en hann slapp út af sjálfsdáðum. Mikið viðbragð var vegna útkallsins; bæði frá slökkviliði, sjúkraflutningum og lögreglu.
Að sögn Péturs Péturssonar, slökkviliðsstjóra Brunavarna Árnessýslu, var mikill eldur í einu herbergi og reykur barst um allt húsið, sem er á tveimur hæðum.
„Við vorum fljótir á vettvang og slökkvistarfið gekk hratt og vel en þarna hefði getað farið illa. Það eru miklar skemmdir á húsinu,“ sagði Pétur í samtali við sunnlenska.is.
Lögreglan á Suðurlandi rannsakar upptök eldsins.