Selfossveitur biðja íbúa Sveitarfélagsins Árborgar um að fara eins sparlega með heita vatnið og mögulegt er næstu daga.
Nú er kalt í veðri og útlit fyrir að svo verði næstu daga og vatnsstaða heita vatnsins er lakari nú vegna þurrkatíðar sem hefur verið undanfarið.
Selfossveitur benda meðal annars á að vegna tíðafars sé óþarft að viðhalda kyndingum á snjóbræðslum. Þá skipta stillingar ofna einnig máli, að óþarflega heitt vatn renni ekki frá þeim og að ofnarnir séu ekki byrgðir, til dæmis með síðum gluggatjöldum eða húsgögnum.
Fólk getur einnig sparað heitt vatn og þar með kyndikostnað sinn með því að gæta að því að gluggar séu ekki opnir og útidyr ekki látnar standa opnar lengur en þörf er á. Þá eru heitir pottar talsvert þurftafrekir á vatn og gott að hafa í huga að fara sparlega með neysluvatn eins og við uppvask og böð.