Rúmlega 71% íbúa Flóahrepps eru mótfallnir því að sveitarstjórn skoði sameiningu sveitarfélaga frekar. Ráðgefandi íbúakönnun var lögð fyrir kjósendur í Flóahreppi samhliða sveitarstjórnarkosningunum í maí sl.
Þegar spurt var hvort ætti að skoða sameiningu sveitarfélaga sögðu 308 íbúar, 71,3% nei og 124 íbúar, 27,7% já. Sautján seðlar voru auðir eða ógildir.
Í könnuninni var einnig spurt til hvaða sveitarfélaga eða svæða Flóahreppur ætti að snúa sér ef til sameiningar kæmi. Þar nefndu 189 íbúar Skeiða- og Gnúpverjahrepp, 171 Ásahrepp og 148 Sveitarfélagið Árborg. Þar á eftir komu Uppsveitir Árnessýslu, þá Árnessýsla í heild sinni og að lokum vestursvæði Árnessýslu, sem er Árborg, Ölfus og Hveragerði.
„Niðurstöðurnar sýna skýrt að meirihluti íbúa Flóahrepps vill ekki fara í sameiningarviðræður að svo stöddu og vilja íbúar að Flóahreppur verði áfram sjálfstætt sveitarfélag. Niðurstöðurnar gefa sveitarstjórn mikilvæga og gagnlega innsýn í viðhorf íbúa og gefa skýra mynd af þeim sveitarfélögum sem helst kæmu til greina ef slíkar umræður yrðu teknar upp síðar,“ segir í bókun sveitarstjórnar sem samþykkt var samhljóða á fundi hennar í gær.