Íbúar Sveitarfélagsins Árborgar eru í fyrsta skipti orðnir 13 þúsund talsins en sá áfangi náðist í dag.
Sveinn Ægir Birgisson, bæjarfulltrúi í Árborg, vekur athygli á þessu á Facebooksíðu sinni.
Íbúafjöldinn varð 12 þúsund í júní árið 2024 og hefur íbúum sveitarfélagsins því fjölgað um eitt þúsund á rétt tæpum tveimur árum.
„Það er kannski ekki lengur stórfrétt að íbúum fjölgi hér, enda mikil uppbygging í innviðum og íbúðarhúsnæði. Þá er frjósemi mikil og fjölgun barna meiri en víða annars staðar,“ segir Sveinn Ægir.
Árborg er áttunda stærsta sveitarfélag á Íslandi á eftir Mosfellsbæ, þar sem í dag búa 14.245 manns.