Whitehay Capital hefur unnið að uppbyggingu á landeldisstöð fyrir bleikju á Stjórnarsandi við Kirkjubæjarklaustur síðustu mánuði.
Landið sem félagið fékk úthlutað er í eigu Skaftárhrepps og er um 9 hektarar að stærð. Whitehay Capital hefur borað þar fyrir köldu vatni og gáfu þær boranir afar góða niðurstöðu.
Þar sem vatn og land er nógu stórt á Stjórnarsandi hefur Whitehay Capital ákveðið að selja landareign sína við Tungu og byggja alla starfsemina upp á einum stað.
„Við höfum átt afar gott samstarf við sveitarfélagið við þessa uppbyggingu og vonandi helst það áfram. Við erum stolt af þessu samstarfi og hlökkum til að halda áfram að vinna saman að uppbyggingu á Klaustri,“ segir Kormákur Artúrsson, sem leiðir fjárfestingar- og verkefnastarfsemi Whitehay Capital.
Félagið er núna að vinna að hönnun og umhverfismati fyrir verkefnið sem yrði unnið í þremur áföngum eða frá 1.500 tonnum upp í 5.000 tonn. Mun þessi vinna liggja fyrir á næstu vikum.